“Nanggaling kami ng Pandacan, Manila. Ang hirap po talaga ng buhay namin doon kasi sa tabing-ilog po kami. Kapag umulan, talagang bumabaha, umaapaw iyong tubig. Binaha kami noong 2010. Hindi kami makababa kasi creek iyong katabi namin at halos abutin na iyong second floor namin. Nagdasal na lang kami, iyong lang ang pag-asa namin. Iyon talaga ang hindi namin makakalimutan. Kaya noong mabigyan kami ng bahay, naiyak kami sa tuwa dahil ito na iyong simula. Pinagtiyagaan naming mag-ipon para maipagawa iyong ilang bagay dito sa bahay. Mas nakaluwag-luwag din kami sa paggalaw sa bahay at saka sa buhay namin. Komportable po iyong may bahay, kung anong gagawin mo sa bahay mo. Di tulad ng nangungupahan, natatakot kang [magpagawa] kasi hindi ito atin. Ito atin na.”

Jonathan Taño and Marites Belmores
Habitat homeowners in Calauan, Laguna since 2012

“Masalimuot ang buhay namin noon sa depressed area sa San Miguel sa Maynila. Dati hindi naman namin alam ang tungkol sa housing. Hanggang sa dumating iyong punto na kinailangan na naming umalis doon dahil kapag umuulan lagi kang nangangamba, anytime pwedeng mabuwal iyong bahay. Lagi kong iniisip paano ang mga anak ko, saan kami titira? Noong dumating ang pagkakataong ito, sinunggaban na namin. Masaya kasi titirhan mo iyong pinaghirapan mo. Pangarap ng nanay ko na magkaroon siya ng bahay pero bago pa kami makalipat, pumanaw na siya. Naging pamana niya na ito sa amin.Dati kapag umuulan, palagi na lang kaming nangangamba na baka paggising natin, nakalutang na tayo. Dito, kapag umuulan, ang sarap ng tulog namin, wala ka nang iisipin. Di na rin kami kailangang [mangamba] na naku baka paalisin tayo kasi di naman atin to. Eh ito kapag natapos namin iyong 20 years, amin na talaga. Maipapamana ko pa sa mga anak ko.”

Alma Narciso
Habitat homeowner in Pasig 2 since 2012